ხაშურში ნარჩენების მართვის გეგმა განიხილეს

ხაშურის მუნიციპალიტეტში მუნიციპალური ნარჩენების მართვის 5 წლიანი გეგმა შეიმუშავეს. გეგმის შემუშავება საქართველოს კანონის „ნარჩენების მართვის კოდექსი“-ს თანახმად განხორციელდა და მოიცავს 2018-2022 წლების პერიოდს,- ამის შესახებ ინფორმაციას ხაშურის მუნიციპალიტეტის გამგეობა ავრცელებს. 

7 ნოემბერს ხაშურის მუნიციპალიტეტის ადმინისტრაციულ შენობაში საჯარო მოხელეებისათვის ადმინისტრაციული ერთეულებისა და მოსახლეობის წარმომადგენლებისთვის გეგმის საჯარო განხილვა მოეწყო.

გეგმა მიზნად ისახავს ნარჩენების მართვის ისეთი სისტემის შემუშავებასა და განხორციელებას, რომელიც უზრუნველყოფს მუნიციპალიტეტის ტერიტორიაზე მცხოვრები მოსახლეობის, კომერციული ობიექტებისა და ადგილობრივი საწარმოებისათვის ნარჩენების შეგროვებისა და გატანის ეფექტიანი სერვისის მიწოდებას.

მუნიციპალიტეტის ტერიტორიაზე არსებული უკანონო ნაგავსაყრელის დახურვა–რემიდიაციას; ასევე, გეგმა მიზნად ისახავს მუნიციპალიტეტში ნარჩენების სეპარირებულად შეგროვების სისტემების ეტაპობრივ დანერგვას, მომსახურებაზე გაწეული დანახარჯების ამოღების ეფექტიანი სისტემის დანერგვასა და მის გამართულ ფუნქციონირებას.

შეხვედრას წარმართავდნენ კავკასიის გარემოსდაცვითი არასამთავრობო ორგანიზაციების ქსელი CENN-ის შიდა ქართლის კორდინატორი ირმა კიტრიაშვილი და ხაშურის მუნიციპალიტეტის გამგეობის ეკონომიკური განვითარების სამსახურის ინფრასტრუქტურის განვითარებისა და კეთილმოწყობის განყოფილების სპეციალისტი, სამუშაო ჯგუფის წევრი არჩილ შალიბაშვილი.

მათ დამსწრეთ მუნიციპალური ნარჩენების მართვის გეგმის შემუშავებისა და მისი ეფექტიანად განხორციელების მნიშვნელობა გააცნეს. ნარჩენების მართვის კოდექსის შემუშავებაში, ხაშურის მუნიციპალიტეტს დახმარება გაუწია კავკასიის გარემოსდაცვითი ორგანიზაციათა ქსელმა CENN -მა პროექტ ,, ნარჩენების მართვის ტექნოლოგიები რეგიონებში‘’ (WMTR) ფარგლებში.

პროექტს ფინასურ დახმარებას აშშ-ს საერთაშორისო განვითარების სააგენტო უწევს.
შეხვედრის ბოლოს გაიმართა საინტერესო დისკუსია.