ქუთაისის ადგილობრივი ხელისუფლება ქალაქის გამწვანებაზე მუშაობას იწყებს

ქუთაისის მერიის ინიციატივით აქცია „ ქუთაისი მწვანე ქალაქი“ დაიწყო. აქციის ფარგლებში დღეს უკვე პირველი ხეები დარგეს. წიწვოვანი ხეები პირველად რიონჰესის დასახლებაში დაირგო.

გამწვანების აქციაში ქუთაისის მერი გიორგი ჭიღვარია ჩაერთო.

მისი განცხადებით, მწვანე ზოლის და რეკრეაციული ზონების მოწყობა ქალაქის ყველა უბანში გაგრძელდება. ამასთან პროექტის ფარგლებში დაგეგმილია 50 000 ლარის ღირებულების ვარდის ნერგების შეძენა რომელიც ქუთაისში მაისის თვეში დაირგვება.

„დავიწყეთ მასშტაბური გამწვანების აქცია, რომელშიც ახალგაზრდები და მოქალაქეები ჩაერთვებიან. ასევე ყველა დაწესებულებას და ობიექტს ვთავაზობთ თავისი წვლილი შეიტანონ ჩვენი ქალაქის გამწვანებაში. რეკრეაციული ზონების არსებობა სასიცოცხლოდ მნიშვნელოვანია. ჩვენ პრინციპულად ვუდგებით ამ საკითხს. ქალაქში არ გაიჩეხება ხეები და არ გასხვისდება სკვერები.“- განაცხადა ქუთაისის მერმა გიორგი ჭიღვარიამ.