“ნაცმოძრაობა”: აჭარაში წითელას ეპიდემიის აფეთქების ეპიცენტრი “ოცნების ქალაქი” დასახელდა

"აჭარაში წითელას ეპიდემიის აფეთქების ეპიცენტრი სანიტარული მდგომარეობიდან გამომდინარე "ოცნების ქალაქის" დასახლებაა, თუმცა აჭარის ჯანდაცვის სამინისტრო გაურკვეველი მიზეზებით ფაქტდ ასაიდუმლოებს" – აღნიშნული განცხადება დღეს დასახლებაში "ნაციონალური მოძრაობიდან" დეპუტატმა გიორგი დიასამიძემ გააკეთა.

"გაზაფხულის დადგომასთან და ტემპერატურის მატებასთან ერთად რისკები იზრდება. ჯანდაცვის სამინისტრო ინფორმაციას სავარაუდოდ იმ მიზეზით, ასაიდუმლოებს, რომ ადგილობრივმა ხელისუფლებამ დღემდე ვერ გადაჭრა პრობლემა. მოვუწოდებ მთავრობას სასწრაფოდ მოაგვაროს აქ ანტისანიტარიის გლობალური პრობლემა და დადგეს ჯანდაცვის წარმომადგენლების პასუხისმგებლობის საკითხი"-აცხადებს გია დიასამიძე.

ოპოზიციის განცხადებას უსაფუძვლოს უწოდებენ აჭარის საზოგადოებრივი ჯანდაცვის ცენტრში.

"აჭარაში წითელას 226 შემთხვევიდან მხოლოდ ერთი დაფიქსირდა "ოცნების ქალაქში", ისიც ერთ წლამდე ბავშვს, რომელიც ვერ იქნებოდა ასაკის გამო აცრილი. ყველა ბავშვი კონტროლზეა და ყველას უტარდება ვაქცინაცია. აპრილიდან კი როცა რეგიონში სადეზინფექციო სამუშაოებს ვიწყებთ, უკვე წლებია პირველად სწორედ ამ დასახლებას ვაკითხავთ. ასე იქნება წელსაც და დაინტერესებულ პირებს, შეუძლიათ გადაამოწმონ"-განუცხადა "აიპრესს" ცენტრის ხელმძღვანელმა ნინო ნიჟარაძემ.