მარტვილის სოფელ ვედიდკარში მრავალწლიანი წიწვის ხეების მოჭრას აპროტესტებენ

ამ წუთებში მოსახლეობა საპროტესტო აქციას მართავს მარტვილის სოფელ ვედიდკარში. მათი უკმაყოფილების მიზეზი მრავალწლიანი წიწვის ხეების მოჭრაა. შეკრებილების ცნობით, მცენარეები სახელმწიფო მიწაზე მოიჭრა, ტერიტორიაზე, რომელიც თავის დროზე ერთ-ერთმა კერძო პირმა კანონდარღვევით შეიძინა. მათივე ინფორმაციით, ხეების ჭრის პროცესი ჯერ კიდევ სექტემბერში დაიწყო და რამდენიმე დღის წინ განახლდა. აქციის მონაწილეები ამბობენ, რომ დაახლოებით 60 წლოვანი 13 წიწვი უკვე მოიჭრა, მომავალში კი ჭრის გაგრძელების უფლებას არავაის მისცემენ. მათივე ცნობით, ამ ამბით გარემოს დაცვის სამინისტრო უნდა დაინტერესდეს.

აქციის მონაწილეებთან მივიდა მარტვილის მერი ალექსანდრე გრიგალავა და ინდმეწარმე გოჩა დანელია, რომელმაც ხეების ჭრა განახორციელა. მისი თქმით, უფლება ხეების ჭრის მიწის მეპატრონისგან, ბადრი ჯელიასგან ოფიციალურად შეიძინა, შესაბამისი დოკუმენტაციის წარმოდგენის შემდეგ. მისი თქმით, ჯამში 15 ხე შეიძინა, რომელთაგან ათი უკვე მოიჭრა და მოჭრის დანარჩენ ხუთსაც, რადგან კანონს არ არღვევს. გოჩა დანელიამ აქციას „ნაციონალური მოძრაობის“ მიერ მართული უწოდა.

თავის მხრივ, მარტვილის მერმა ალექსანდრე გრიგალავამ ჟურნალისტებს განუცხადა, რომ ამ საქმის შესწავლა დაიწყება, ძიების დასრულებამდე კი შეეცდებიან ხეების ჭრის პროცესი დროებით შეჩერდეს.

მისივე თქმით, შესაბამის ორგანოებს, მათ შორის გარემოს დაცვის სამინისტროს შეატყობინა ამ ამბის შესახებ. მერისვე ცნობით, ეს ტერიტორია სახელმწიფო ტერიტორიაა. თუ რა უფლებით აქვს ის კერძო პირს, ამას გრიგალავას სიტყვებით გამოძიება დაადგენს.