აჭარის უმაღლესმა საბჭომ პარლამენტის შემუშავებული რეზოლუცია მიიღო

16 ხმით აჭარის უმაღლესმა საბჭომ მიიღო რეზოლუცია არჩილ ტატუნაშვილთან და გიგა ოთხზორიასთან დაკავშირებით. ავტონომიური რესპუბლიკის უმაღლესი საკანონმდებლო ორგანო პასუხისმგებლობას აკისრებს რუსეთის ფედერაციას და საერთაშორისო ორგანიზაციებს მოუწოდებს შესაბამისი რეაგირებისკენ:

„აჭარის ავტონომიური რესპუბლიკის უმაღლესი საბჭო მკაცრად გმობს 

1. ოკუპირებული ცხინვალის რეგიონში, (ე.წ. სამხრეთ ოსეთში) საქართველოს მოქალაქე არჩილ ტატუნაშვილის სიცოცხლის ხელყოფის ფაქტს რაზეც სრულ პასუხისმგებლობა ეკისრება რუსეთის ფედერაციას. 

2. საოკუპაციო ხაზთან საქართველოს მოქალაქე გიგა ოთხზორიას სიცოცხლის ხელყოფის ფაქტს, რაზეხ, ამ შემთხვევაშიც, სრული პასუხისმგებლობა ეკისრება რუსეთის ფედერაციას. 

3. რუსეთის ფედერაციის მხრიდან საქართველოს ტერიტორიის ოკუპაციას და აფხაზეთისა და ცხინვალის რეგიონის ანექსიისკენ მიმართულ ქმედებებს.
მივმართავთ საერთაშორისო საზოგადოებას, ევროპის საბჭოს ადგილობრივ და რეგიონულ ხელისუფლებათა კონგრესს, ასევე ევროპის რეგიონთა ასამბლეას, გააძლიერონ ძალისხმევა ოკუპირებულ აფხაზეთსა და ცხინვალის რეგიონში ადამიანის უფლებათა დაცვისა და უსაფრთხოების უზრუნველყოფისთვის“-ნათქვამია რეზოლუციაში 

რეზოლუციის მიღების პროცესს არ დაესწრო ნაციონალური მოძრაობის დეპუტაცია. მათი განცხადებით, მას შემდეგ, რაცჟენევის მოლაპარაკებათა ფორმატში აფხაზეთი და ე.წ. სამხრეთ ოსეთი განიხილება, როგორც მხარე, ყოველგვარი რეზოლუცია აზრს კარგავს.