ასლან კვირიკაძე: აჭარის მთავრობის მიერ სწავლის დაფინანსებამ მომცა სტიმული, ვიყო კარგი სტუდენტი

აჭარის ავტონომიური რესპუბლიკის განათლების, კულტურისა და სპორტის სამინისტრო 2012 წლიდან უმაღლესი განათლების ხელშეწყობის პროგრამის ფარგლებში ახორციელებს სტუდენტთა დახმარების ქვეპროგრამას. 2017-2018 სასწავლო წლის პირველი სემესტრისთვის სულ დაფინანსდა 345 სტუდენტი მათ შორის: 314 ბაკალავრი და 31 მაგისტრანტი,- ამის შესახებ ინფრომაციას აჭარის ავტონომიური რესპუბლიკის განათლების, კულტურისა და სპორტის სამინისტრო ავარცელებს.

ერთ-ერთი გახლავთ სსიპ თბილისის სახელმწიფო სამედიცინო უნივერსიტეტის, მედიცინის სპეცილობის სტუდენტი – ასლან კვირიკაძე.

ასლან კვირიკაძე 2012 წელს ჩაირიცხა სსიპ თბილისის სახელმწიფო სამედიცინო უნივერსიტეტში მედიცინის სპეციალობაზე. დაფინანსება ჩარიცხვისთანავე მოიპოვა, როგორც სტუდენტმა მაღალმთიანი აჭარიდან. ასლანი გაომირჩევა მაღალი აკადემიური მოსწრებით.

ასლან კვირიკაძე -„ვერ ვიხსენებ როდის გადავწყვიტე ექიმობა, რადგან ბავშვობიდან სხვა პროფესიის არჩევის სურვილი არც მქონია და დარწმუნებული ვარ სწორი გადაწყვეტილება მივიღე. ალბათ გადამეტებული თავდაჯერებულობისა და არასაკმარისი მომზადების შედეგი იყო ის, რომ ვერ ავიღე სრული სასწავლო გრანტი და მომიწია სწავლის დაფინანსებისთვის სხვა წყაროების ძიება.

აჭარის განათლების, კულტურისა და სპორტის სამინისტროს „სტუდენტთა დახმარების“ ქვეპროგრამაში მივიღე მონაწილეობა და მოვიპოვე დაფინანსება. ამ ფაქტმა უფრო მეტი სტიმული მომცა, რომ ვიყო კარგი სტუდენტი. ახლა მეექვსე კურსელი ვარ და ვფიქრობ დასახული მიზნისთვის არ გადამიხვევია. თავისუფალ დროს კლინიკაში ვატარებ. ვცდილობ თეორიული ცოდნა პრაქტიკით გავიმყარო, ღამის ცვლებში ბავშვთა რეანიმაციაში ვმუშაობ, ეს ჩემთვის ძალიან საინტერესო და ბევრის მომცემია. რთულია სხვა საქმისთვის დრო გამონახო, როცა სამედიცინოზე სწავლობ, მიუხედავად ამისა ვცდილობ ჩავერთო სხვადასხვა აქტივობებში, ვმონაწილეობ სტუდენტურ კონფერენციებსა და ინტელექტუალურ თამაშებში.

რადგან ვაცნობიერებ ვერ იქნები კარგი ექიმი თუ არ ხარ ზოგადად განათლებული. მადლობა მინდა გადავუხადო ყველა იმ ადამიანს, ვინც მეხმარება და მხარს მიჭერს, არ შემიძლია არ ვახსენო ბაბუა, რომელიც ჩემი საუკეთესო მეგობარი, მასწავლებელი და გულშემატკივარია და განსაკუთრებული მადლობა მინდა გადავუხადო აჭარის განათლების, კულტურისა და სპორტის სამინისტროს ფინანსური დახმარებისთვის, ამ დახმარებამ მაგრძნობინა რომ ჩემს მხარეს, ჩემს რეგიონს ვჭირდები წარმატებული და ჩემს საქმეში პროფესიონალი მოქალაქე“.

აჭარის ავტონომიური რესპუბლიკის განათლების, კულტურისა და სპორტის სამინისტროს წარმატებებს უსურვებს ასლან კვირიკაძეს.